Ambasada e SHBA: Llalla, Dako e Doshi ndalohen përjetësisht të hyjnë në Amerikë
Ambasada e Shteteve të Bashkuara në Tiranë, ka theksuar rëndësinë që ka për SHBA, lufta kundër korupsionit dhe respektimi i ligjit. Gjithashtu Ambasada e SHBA ka publikuar nenin 7031(c) të legjislacionit të Shteteve të Bashkuara, sipas të cilit Sekretari i Shtetit ka autoritetin të shpallë individët dhe anëtarët e familjes së tij/saj të afërt si të skualifikuar përgjithmonë për të hyrë në SHBA, një zyrtar qeveritar të përfshirë në korrupsion madhor.
“Kur Shtetet e Bashkuara mësojnë se një zyrtar qeveritar i huaj është përfshirë në korrupsion madhor, Sekretari i Shtetit ka autoritetin të shpallë individët dhe anëtarët e familjes së tij/saj të afërt si të skualifikuar përgjithmonë për të hyrë në Shtetet e Bashkuara”, shkruan Ambasada Amerikane nëpërmjet një videoje të postuar në faqen e vet në Facebook.
Në postimin e ambasadës përmenden rastet e ish-kryeprokurorit, Adriatik Llalla, ish-kryebashkiakut Vangjush Dako dhe deputeti Tom Doshi, gjithashtu ambasada njofton se të tjerë zyrtarë priten të jenë në listën e personave të cilëve nuk u lejohet hyrja në SHBA
Postimi i Ambasades Amerikane në faqen zyrtare në FB:
Lufta kundër korrupsionit është prioritet i punës së Ambasadës së Shteteve të Bashkuara në Tiranë. Këtë javë, ne do të shpjegojmë përcaktimet publike për korrupsion madhor sipas Nenit 7031(c) të legjislacionit të Shteteve të Bashkuara. Kur Shtetet e Bashkuara mësojnë se një zyrtar qeveritar i huaj është përfshirë në korrupsion madhor, Sekretari i Shtetit ka autoritetin të shpallë individët dhe anëtarët e familjes së tij/saj të afërt si të skualifikuar përgjithmonë për të hyrë në Shtetet e Bashkuara. #ShqiperiaLuftonKorrupsionin #NdalKorrupsionit
