Po rikriojhet Gjykata Kushtetuese?
Parlamenti shqiptar pritet të nisi këtë javë procedurat për zgjedhjen e dy anëtarëve të rinj të Gjykatës Kushtetuese. Të martën Komisioni Parlamentar i Ligjeve pritet të dëgjojë tre kandidatë. Pas dëgjesës komisioni do të hartojë një raport për secilin prej juristëve për t’ia përcjellë më pas parlamentit. Ky i fundit do të vendosi me 84 vota se cilët do të jenë dy anëtaret e rinj të Gjykatës Kushtetuese. Votimi e kandidatëve në parlament është planifikuar të zhvillohet më 14 nëntor. Pas këtij votimi Gjykata Kushtetuese do të ketë 5 anëtarë.
Ndërkaq kreu i shtetit Ilir Meta, pas zgjedhjes së gjyqtarit Besnik Muçi, ka afat deri në 8 nëntor për të zgjedhur një tjetër anëtar të kësaj gjykate. Mungesa e Gjykatës Kushtetuese është një nga ngërçet që ka krijuar Reforma në Drejtësi dhe një nga debatet më të mëdha mes maxhorancës dhe opozitës.
